Ծրագրի փակման միջոցառման 2-րդ օրը ներկայացվեց կլիմայական գործողությունների ազդեցությունը Ստեփանավան և Ալավերդի համայնքներում

Ապրիլի 15-ին Ստեփանավան և Ալավերդի համայնքները հյուրընկալեցին ՄԱԿ-ի Զարգացման ծրագրի (ՄԱԶԾ), միջազգային կազմակերպությունների և տեղական իշխանությունների ներկայացուցիչներին՝ Կլիմայի կանաչ հիմնադրամի (ԿԿՀ) և ՄԱԶԾ-ի «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի փակման շրջանակում այցելության ընթացքում։ Այն հնարավորություն տվեց տեսնելու, թե ինչպես են երկարաժամկետ կլիմայական ներդրումներն արդեն այսօր բարելավում Լոռու մարզի համայնքների առօրյա կյանքը։

Միջոցառումներին մասնակցել են պրն․ Լեյֆ Հոլմբերգը, ԿԿՀ կառավարման խորհրդի համանախագահ, տկն․ Նաթիա Նացվլիշվիլին, Հայաստանում ՄԱԶԾ մշտական ներկայացուցիչ, պրն․ Ավետիք Դարբինյանը, ՀՀ տարածքային կառավարման և ենթակառուցվածքների նախարարի տեղակալ, տկն․ Սուն Մի Լին, ԿԿՀ Արևելյան Եվրոպայի, Կենտրոնական Ասիայի և Մերձավոր Արևելքի երկրների համակարգող/Ծրագրի ղեկավար, տկն․ Յանա Կոպեռնիկը, ՄԱԶԾ տարածաշրջանային տեխնիկական խորհրդատու, պրն․ Արմեն Եսոյանը, ՀՀ ՇՄՆ Բնապահպանական ծրագրերի իրականացման գրասենյակի տնօրեն, պրն․ Արսեն Ղարիբյանը, Լոռու մարզպետի տեղակալ, պրն․ Արմեն Գրիգորյանը, Ստեփանավանի քաղաքապետ, պրն․ Դավիթ Ղումաշյանը, Ալավերդու քաղաքապետ, ինչպես նաև այլ բարձրաստիճան պաշտոնյաներ։

Ստեփանավանում և Ալավերդիում արդիականացված բազմաբնակարան բնակելի շենքերից մինչև հանրային կառույցներ՝ այցը ներկայացրեց շոշափելի արդյունքներ․ երկու քաղաքներում վերանորոգվել է 92 բնակելի և 9 հանրային շենք՝ բարձրացնելով հարմարավետությունը, կրճատելով էներգիայի ծախսերը և բարելավելով կենսապայմանները ավելի քան 11,500 բնակչի համար՝ ապահովելով նաև անուղղակի օգուտներ ավելի քան 20,000 բնակչի համար։

Այս արդյունքները հնարավոր են դարձել ՄԱԶԾ-ի և Հայաստանի Հանրապետության կառավարության սերտ գործընկերության շնորհիվ՝ տեղական ինքնակառավարման մարմինների հետ համագործակցությամբ, կառավարության սուբվենցիոն ծրագրի շրջանակում։ Նախաձեռնությունը ցույց է տալիս, թե ինչպես կարող է համակարգված համագործակցությունը զարգացման հանձնառությունները վերածել իրական, տեսանելի փոփոխությունների տեղում։

Այցի ընթացքում պատվիրակությունը հանդիպումներ ունեցավ տեղական իշխանությունների և բնակիչների հետ, այցելեց արդիականացված շենքեր և քննարկեց, թե ինչպես են էներգաարդյունավետ ներդրումներն օգնում ընտանիքներին կրճատել էներգիայի ծախսերը, ամրապնդել դիմակայունությունը և նպաստել Հայաստանի կլիմայական նպատակների իրականացմանը։

«Էներգաարդյունավետությունը միայն շենքերի մասին չէ, այն մարդկանց մասին է», ասել է Հայաստանում ՄԱԶԾ մշտական ներկայացուցիչ Նաթիա Նացվլիշվիլին։ «Կառավարության և համայնքների հետ համատեղ ներդրումներ կատարելով բազմաբնակարան շենքերում և հանրային տարածքներում՝ մենք ձևավորում ենք ավելի առողջ համայնքներ, կրճատում արտանետումները և կառուցում ավելի դիմակայուն ապագա Ստեփանավանի և Ալավերդիի նման քաղաքների համար»։

Այցը ևս մեկ անգամ ընդգծեց, որ համայնքների, ազգային հաստատությունների և միջազգային գործընկերների միջև ամուր համագործակցությունը կարող է երկարաժամկետ դրական ազդեցություն ունենալ կլիմայական գործողությունների իրականացման գործում՝ թաղամաս առ թաղամաս, տուն առ տուն։